NAV-Herøy

NAV-kontoret tilbyr tenester du tidlegare fekk frå NAV trygd, NAV arbeid, samt Herøy kommune si sosial- og flyktningteneste. Ved å samordne tenestene våre ønskjer vi å gje brukarane eit betre tilbod enn kva vi greiar kvar for oss. Eit av hovudmåla med NAV-reforma er å få fleire i arbeid og aktivitet, og færre på stønad. Vi ønskjer å skape eit inkluderande samfunn kor alle kan delta. Opninga av NAV-kontoret i Herøy skal bidra til at tenestene våre blir enklare og betre tilpassa kvar enkelt brukar sine behov.

NAV Herøy held til på Herøysenteret, i 2. etasje. Vi ønskjer deg velkomen i nye lokalar.

Tenestene frå NAV Herøy omfattar:

Hjelp og rettleiing til å fylle ut ulike søknadsskjema
Råd og rettleiing på sosiale tenester og økonomisk sosialhjelp
Informasjon og rettleiing om startlån og bustøtte frå Husbanken
Hjelp til bustad for vanskeligstilte
Råd og rettleiing på trygd og pensjonar
Hjelp til å søkje eller komme tilbake til arbeid
Kompetansekartlegging og arbeidsevnevurdering
Oppfølging på arbeidsplassen ved sjukdom og behov for tilrettelegging
Råd og rettleiing til arbeidsgjevarar ved rekruttering, nedbemanning og omstilling
Kva kan du gjere frå eigen PC? Gå inn på www.nav.no og ”Din Side” for å:
- Finne ledige jobbar
- Registrere deg som arbeidssøkjar
- Sende elektroniske meldekort
- Finne ny fastlege eller bytte fastlege
- Bestille europeiske helsetrygdekort
- Bestille pensjonsberekning
- Berekne barnebidrag
- Berekne foreldrepengar
- Finne utbetalingsdatoar og satsar
- Finne meir om dine rettigheitar
- Finne meir om lovar og reglar
Du er velkomen til å gjere dette frå mottaket vårt. Vi hjelper deg om du står fast.
Reiserefusjon og frikort
Alle som skal ha refundert reiseutgifter må levere inn eit kravskjema. Det er viktig å ta med dokumentasjon på ferje, tunnelar, parkering osv. Kravskjema kan du skrive ut frå www.nav.no, eller du kan få det hos oss. All saksbehandling knytt til refusjon av reiseutgifter skal over til dei Regionale Helseføretaka (RHF) i 2010. Frå då av skal alle sende inn kravskjema i posten. Det vil bli gitt meir informasjon om dette seinare, men som ei førebuing oppmodar vi deg allereie no å gjere deg kjent med skjema og utfyllinga av det.
Vi hjelper deg gjerne viss du har spørsmål eller treng hjelp vedrørande frikort og utfylling av kravskjema.