Info English 
Info Deutsch
Øykommunen Herøy har Sunnmørsalpane som bakgrunn og storhavet som næraste nabo. Seks av dei åtte øyane i kommunen er knytte saman med bruer.
Fosnavåg, byen ved Runde, er kommunesenter i ein av dei største fiskerikommunane i landet. Kystbyen Fosnavåg blir og omtalt som den mest innovative byen i Norge på grunn av utviklinga innan offshorefarty (over 100 offshorefarty og åtte offshore-reiarlag).
Med naturhamna si er Fosnavåg ein by der du kan oppleve eit særmerkt kystmiljø.
Herøy, med ca. 8400 innbyggjarar og landareal på ca 135 km2, ligg sørvest for Ålesund. Fly, hurtigbåt, gode vegar og dagleg hurtigruteanløp i Torvik gir lett tilkomst til kommunen både sjø-, luft- og landevegen.
Lengst i vest ligg Runde, den internasjonalt kjende "skatteøya" og det sørlegaste fuglefjellet i Skandinavia. Millionar av sjøfugl har hekkeplassen sin her. På grunn av særpreget sitt er øya freda, men daglege omvisningsturar med båt rundt fuglefjellet, guida fotturar og lett tilkomst til fots på merka stiar, gir høve til å oppleve det yrande fuglelivet på nært hald. Her kan du sjå koloniar av lundefugl, lomvi, havsuler og alke, til saman 200 artar, blant dei også den praktfulle havørna.
Like utanfor øya vart det for nokre år sidan funne ein eventyrleg myntskatt etter det hollandske skipet "Akerendam". Dykkarar jaktar framleis etter skattar, m.a. gullet frå det spanske skipet "Castillo Negro" som skal ha forlist i 1589.
Du finn meir informasjon om Akerendam og forliset her: http://www.dokpro.uio.no/umk/funn/runde.html.
Ei anna særmerkt øy er Skorpa med barsk natur og ei stamme av ville geiter.
Herøy har ei rik historie med fleire gamle velhaldne handelsstader, m.a. Kjeldsund, Flåvær og ikkje minst Herøy gard med kystmuseum og Herøyspelet.
På Nerlandsøy ligg funnstaden for Kvalsund-båtane frå før Vikingtida og vi har fleire gravrøyser frå same tida, m.a. Løsetstranda.
Dei mange øyane med variert flora og fauna gir friluftsfolk og sportsfiskarar høve til å få oppfylt ein draum både frå svaberg og båt. Kvifor ikkje oppleve vårtorskefisket her?
Velkomen til Herøy !