I dag må skipa på hamna late motoren gå for å lage straumen dei treng om bord. Det gir utslepp av klimagassar som ein kan unngå ved å bruke straum frå land i staden.
Kor mykje landstraum kan det vere behov for – og til kor mange skip? Det skal avklarast i eit førprosjekt som Herøy kommune har sett i gang.
– Viktig med informasjon frå reiarlaga
I førprosjektet får reiarlaga som brukar hamna på Mjølstadneset tilsendt ulike spørsmål. Det er selskapet Norconsult som hentar inn informasjonen frå reiarlaga for kommunen.
– Svara frå reiarlaga blir svært viktige når kommunen skal arbeide med landstraumprosjektet, seier Ane Malene Søvik Nygård, kommunalsjef for samfunnsutvikling i Herøy kommune.
Kartlegg trafikkgrunnlaget
Føremålet med førprosjektet er å finne ut
- om det er hensiktsmessig å søke Enova om investeringsstøtte til det moglege landstraumanlegget
- kva trafikkgrunnlaget er
- kva kapasitet eit landstraumanlegg må ha
Kommunen har fått midlar frå Enova til førprosjektet. Enova er eit statleg føretak som fremjar miljøvennleg energibruk og energiproduksjon.