I den siste utgåva av avisa Kommunal Rapport heiter det: «Herøy klatrar heile 103 plassar på Kommunebarometeret og sikrar seg dermed 97.-plassen. Det er Møre-kommunens nest beste plassering nokosinne».
Innanfor grunnskule ligg Herøy heilt oppe på åttandeplassen i landet.
– Blant kommunane som klatrar mest
Kommunebarometeret er ei måling Kommunal Rapport publiserer kvart år. I barometeret blir alle kommunane rangerte etter 155 nøkkeltal frå tolv ulike sektorar.
Herøy er i «Kommuneportrettet» i den siste utgåva, og der konkluderer avisa slik:
«Herøy forbetrar seg i åtte av totalt tolv sektorar og er dermed blant kommunane som klatrar mest på årets kommunebarometer. Særleg i skulesektoren får Møre-kommunen ståkarakter, men Herøy gjer det også betre enn tidligare i dei store sektorane barnevern og barnehage. I tillegg kan kommunen vise til gode resultat innan sosialteneste og kostnadsnivå. Kommunen har framleis ein jobb å gjere når det gjeld å få kontroll på økonomien.»
– Alle lærarane i ungdomsskulen oppfyller krava til undervisning
Avisa trekker fram skulesektoren og skriv dette om grunnskulen vår:
«Dette er blant kommunens beste sektorar dei siste åra. På årets kommunebarometer klatrar kommunen fleire plasser og ender til slutt på ein heiderleg 8. plass. Alle lærarane i ungdomsskulen oppfyller krava til undervisning, også i barneskulen er delen høgare enn i landet elles. I tillegg aukar delen lærarar med kompetanse til å undervise i norsk, engelsk og matematikk både i barneskulen og ungdomsskulen. Totalt 92 prosent av elevane på 10. trinn svarar at dei trivst på skulen. I 7. trinn svarar 89 prosent av elevane det same.»