Dette året er det ikkje berre ein kommune, men to kommunar som tek på seg rolla som arrangør saman med fylkeskommunen.

– Det er fantastisk at kommunane kryssar kommunegrensene og vil gå saman om å vere vertskommunar for fylkesfestivalen, seier Ronja Voldsund, prosjektleiar for UKM fylkesfestival.

Fylkesfestivalen blir arrangert i skolens haustferie, frå 9. til 12. oktober. Sjølve festivalområdet blir i Herøy kulturhus og Herøyhallen, alt samla i same bygget. 

– Fylkesfestivalen 2022, som blei arrangert i Hustadvika kommune, var ein stor suksess med mykje gode tilbakemeldingar frå både ungdommar og vaksne. Dette gjer at vi vel å legge fylkesfestivalen til same tidspunkt i år, seier Ronja Voldsund. 

Heidundrande festival

Også dei to vertskommunane gler seg til at ungdommar frå heile Møre og Romsdal samlar seg i Fosnavåg.

– Herøy kommune gler seg til samarbeid med Sande kommune og fylkeskommunen og er sikker på at det blir ein heidundrande fylkesfestival, seier Mona-Grethe Ryssevik, seksjonsleiar i kulturavdelinga i Herøy kommune. 

UKM fylkesfestival er del av ein ny UKM-modell med meir fokus på tryggleik og det sosiale, og mindre fokus på konkurranse.

– Her skal det vere trygt å uttrykke seg, og UKM er ein meistringsarena der ungdom får utvikle seg i uttrykket sitt, seier Ronja Voldsund. 

(Artikkelen er laga av Møre og Romsdal fylkeskommune.)