Omholt kjem frå Arendal og har budd i Herøy sidan 1990. Ho fyller snart 63 år, er gift og har to vaksne barn og to barnebarn.

– Gjennom åra har eg arbeidd ulike stader i landet og studert både i Noreg og i utlandet. Dei seinare åra har eg tatt psykologutdanning, og frå tidlegare har eg utdanning som hjelpepleiar og sosionom. Eg har også studert organisasjonsfag og rettleiingspedagogikk, fortel Omholt. 

Gler seg til å bruke kunnskapen

Ho har bakgrunn frå arbeid i sosialtenesta i ulike kommunar. Og dei siste åra har ho jobba innanfor pedagogisk-psykologisk teneste, barne- og ungdomspsykiatri og vaksenpsykiatri. 

– Eg har alltid hatt breie faglege interesser. Som kommunepsykolog gler eg meg til å bruke kunnskapen eg har frå både psykologifaget og frå annan erfaring, sidan det er ei omfattande stilling, seier Omholt. 

Kommunepsykologen skal jobbe med 

• helsefremmande og førebyggande arbeid
• tverrfagleg samarbeid
• rettleiing og fagstøtte til ulike profesjonsgrupper i kommunen
• deltaking i systemarbeid, planarbeid og fagutvikling 
• klinisk arbeid, kartlegging og avklaring av behov
• deltaking i det psykososiale krisearbeidet i kommunen

Innbyggarar kan bli tilviste via fastlegen

– Eit viktig mål er å gjere dei tilsette i kommunen mest mogleg trygge på det å møte innbyggarane i ulike livssituasjonar. Eg vil også vere tilgjengeleg for innbyggarar som har behov for samtale med psykolog, i eit visst omfang, seier ho.

Innbyggarar kan be om å bli tilviste til kommunepsykologen via fastlegen eller andre kommunale tenester.

Omholt fortel at på fritida er ho glad i å vere saman med familie og venner – og å gå fjellturar. 

– Då vel eg gjerne turmåla som er med i Ti på topp-ordninga i Herøy, legg ho til. 

Vi ønsker ho varmt velkomen som tilsett i kommunen!