Ungdomsskulane våre ønsker å samarbeide tettare med bedriftene i lokalsamfunnet. Kommunen og næringsforumet sender no brev til bedriftene i Herøy og oppfordrar dei til å registrere seg som såkalla ja-bedrifter. Å vere ei ja-bedrift betyr å vere positiv til å samarbeide med skulane.
– Vi ønsker både store og små ja-bedrifter med i prosjektet, seier Sølvi Lillebø Remøy, kommunalsjef for kultur og oppvekst.
– Det er viktig at næringslivet får vist seg fram for ungdomen. Det er grunntanken bak dette, seier dagleg leiar Sissel Ødegård i Herøy Næringsforum.
Bidra i undervisninga
Dei to aktørane skriv i brevet at dei vil sette stor pris på alt samarbeid mellom bedriftene og ungdomsskulane, både omfattande og mindre omfattande.
Planen er at ja-bedriftene mellom anna kan
- bidra med faglege tema i undervisninga på skulen
- ta imot bedriftsbesøk
- ha elevar på utplassering
- informere elevane om bedrifta
– Vi ønskjer at elevane skal bli betre kjende med moglegheitene for yrke og arbeid lokalt, og håpar med dette også å styrke rekrutteringa til bedriftene. Vi har som mål at skulen skal verte meir praksisorientert, og stimulere elevane til utforsking og entreprenørskap, heiter det i brevet til bedriftene.
Innovasjonscamp 2023
I haust ønsker niande trinnet ved Ytre Herøy ungdomsskule og Stokksund skule å arrangere ein innovasjonscamp. Det skal skje saman med den ideelle organisasjonen Ungt Entreprenørskap.
Kommunen og næringsforumet inviterer bedriftene i Herøy til å ta del i innovasjonscampen.
– Vi er svært takksame dersom de vil vere med på dette prosjektet for å vise ungdommane våre fleire av dei spennande yrkesmoglegheitene heimkommunen deira har å by på, skriv kommunen og næringsforumet til bedriftene.
Innovasjonscampen blir ein del av faget Utdanningsval. Målet med faget er å gjere elevane i stand til å ta gode utdannings- og yrkesval.
På campen vil elevane få eit reelt oppdrag som dei skal arbeide med i ei veke. Oppdraget skal elevane få frå ei bedrift eller ein organisasjon frå privat eller offentleg sektor.