Prosjektet skal gjere seglasen tryggare og meir effektiv i farleia gjennom Herøy, Ulstein og Ålesund. Ruben Iversen, Kystspotter.no

Arbeidet er planlagt å starte i august og omfattar utdjuping av farleia og etablering av nye navigasjonsinstallasjonar. Når prosjektet er ferdig, vil det gi betre framkome, tryggare navigasjon og redusert risiko for grunnstøytingar og kollisjonar.

– Vi er glade for at kontrakten no er på plass. Dette er eit prosjekt som vil komme sjøtrafikken til gode i mange år framover, og vi ser fram til eit godt samarbeid med Terramare og Herøy kommune i gjennomføringa, seier Ruben Rostad, fungerande leiar for utbyggingsavdelinga i Kystverket.

Frå Hasundhornet mot Skinnabrokleia Martin Hauge-Nilsen

Eit viktig løft for ei krevjande farlei

Prosjektet omfattar utbetringar av hovudleia mellom Røyrasundet og Svædet, mellom anna gjennom justering av delar av leia sin trasé. Dagens farlei har fleire grunne parti, mange kursendringar og krevjande navigasjonsforhold. Gjennom utdjuping av farleia og etablering av nye navigasjonsinstallasjonar skal prosjektet gjere leia både tryggare og meir effektiv for sjøtrafikken.

Tiltaka vil redusere risikoen for grunnstøytingar og kollisjonar, samtidig som dei bidreg til å redusere sannsynet for forureining i sårbare naturområde.

Samarbeid gir gjenbruk av overskotsmassar

Som ein del av prosjektet har Kystverket inngått ein avtale med Herøy kommune om gjenbruk av overskotsmassar frå utdjupinga. Om lag 200 000 kubikkmeter massar skal nyttast til utfylling ved Eggesbønes. Dette vil leggje til rette for eit framtidig næringsareal på om lag 20 000 kvadratmeter. Ved å gjenbruke massane frå utdjupinga unngår prosjektet behovet for å hente ut tilsvarande fyllmassar frå steinbrot på land.

Prosjektet er også planlagt med omsyn til naturmiljøet, og anleggsarbeidet blir tilpassa mellom anna hekkeperiodar, smoltvandring og gyteperiodar.

Kontrakten

Kontrakten har ein verdi på 182,7 millionar kroner eksklusive meirverdiavgift.

Det kom inn to tilbod i konkurransen. Begge tilbydarane vart vurderte som kvalifiserte, og kontrakten vart tildelt på grunnlag av lågaste tilbodspris.

– Vi er glade for å ha fått tilliten og ser fram til å komme i gang med arbeidet. Dette er eit viktig prosjekt, og vi ser fram til eit godt samarbeid med Kystverket om ei trygg og effektiv gjennomføring,  seier Hannu Tomperi, Managing Director i Terramare Oy.  

Arbeidet er planlagt å starte i august 2026, og prosjektet er venta fullført i løpet av vinteren/våren 2028.

Terramare Oy er entreprenør for prosjektet og startar arbeidet i august 2026 Terramare Oy, Manu-Pekka